आफ्नै गाउँ बस्तीमा रहेको खोरिया संरक्षणको लागि भन्दै निर्माण गरिएको कबुलियत वन उत्कृष्ट हुँदै नगद सहित सम्मानपत्र प्राप्त गरे पछि
हुजुरुम कबुलियत वनका अध्यक्ष मधु माया प्रजा खुशिले दङ्ग देखिएकोछ । २६१ वटा कबुलियत वन समूह मध्ये उत्कृष्ट हुँदै तेश्रो बनेको हुजुरुमले नगद १० हजार रुपैया सहित सम्मानपत्र प्राप्त गरेको हो ।
बि.स. २०७७ सालमा ७ जनाको समूह बनाई राक्सिराङ्ग गाउँपालिका वडा नम्बर ५ मा खोरिया संरक्षण गर्न भन्दै कबुलियत वन समूह दर्ता गराएका मधु मायाको टिमले ५ बर्षको छोटो अवधिमा खोरिया संरक्षण मात्र नभई वन जङ्गल जोगाई उत्कृष्ट हुँदै पुरस्कृत हुन पुगेकोछ ।
हुजुरुम कबुलियत वन समूहले वन जङ्गल संरक्षण र सम्बर्द्धन सङसङै मासिक बचत गर्दै टिमलाई थप उर्जा र हौसला प्रदान गर्दै आईरहेकोछ । उनिहरुले मासिक रु. ५० को दरले प्रती ब्यक्ती जम्मा गर्ने गरेकाछन् । डिभिजन वन बाट प्राप्त रकम कोषमै राख्ने अध्यक्ष प्रजाले बताईन ।
४ हेक्टर क्षेत्रफलले ओगटेको हुजुरुम कबुलियत वन क्षेत्रमा अमृशो ,भुई कटर ,निबुवा ,एभोकाडो , साल र चिउरी लगाएतका अन्य बिरुवाहरु हुर्कदै गईरहेकोछ ।
कबुलियत वनबाट उत्पादन भएका निबुवा , भुईकटहरले बजार पाउन नसकेको भन्दै अध्यक्ष प्रजाले बिक्री नहुने समस्या हामिलाई सिजनको बेलामा पिरोल्ने गरेको बराउनुभयो । अझै पनि आफ्नो कबुलियत वन समूहलाई राम्रो बनाई राख्नको लागि सक्दो मेहेनत गर्ने बताउदै अध्यक्ष प्रजाले डिभिजन वन कार्यालय राप्तीलाई धन्यवाद समेत दिनुभयो ।
हुजुरुम सङ्गै डिभिजन वन कार्यालय राप्ती मनहरीले गुप्तेश्वरी कबुलियत वन उपभोक्ता समूह भिमफेदी -४ र क्याम्पाडाँडा कबुलियत वन उपभोक्ता समूह हेटौंडा -१९ लाई आर्थिक वर्ष २०८१/०८२ को उत्कृष्ट कबुलियत वन समूह घोषणा सहित नगद र सम्मानपत्र प्रदान गरिएको छ ।
