मनहरी गाउँपालिकामा सोमबार वडा अध्यक्ष माथी हात पातको प्रयास भएकोछ । मनहरी गाउँपालिका वडा नम्बर ६ का अध्यक्ष युवराज थपलिया जोगिताल स्थित आफ्नै तरकारी बारिमा जादा उनी माथी हातपातको प्रयास भएको हो ।
वडा अध्यक्ष थपलियालाई हातपातको प्रयास गर्ने ब्यक्ती सोही वडाको भुल्चोक निवासी बर्ष ३२ का मान बहादुर वाईबा रहेको ईलाका प्रहरी कार्यालय मनहरीले जानकारी दिएकोछ ।
प्रत्यक्षदर्शीका अनुसार साँझ ५:३४ बजे तिर मादक पदार्थ सेवन गरि आएका ती युवाले वडा अध्यक्षलाई आफ्नो खेत खोलाले बगाउँदा समेत सुरक्षाको कुनै उपाय नअपनाईएको भन्दै उनी माथी हातपातको प्रयास भएको हो ।
जोगिताल टोल बिकास समितीका अध्यक्ष समीर मुक्तानले थप्दै भन्नुभयो वडा अध्यक्ष आफ्नो बारिमा तरकारी हेर्न आउनुभएको थियो सोही क्रममा उक्त युवाले एक्कासी हातपातमा उत्रियो । मुक्तानको भनाई अनुसार वडा अध्यक्षलाई दुईपटक टाउकोमा हान्ने प्रयास गरेपछि वरपरको प्रत्यक्षदर्शीहरुले घटनालाई थप जटिलता बन्न नदिन सुनाचुरी पोष्टबाट प्रहरीलाई बोलाई ईलाका प्रहरी कार्यालय मनहरीको टोलिलाई बुझाईएको थियो ।
घटनामा संलग्न युवालाई आफुहरुको नियन्त्रणमा लिई थप अनुसन्धान भईरहेको ईलाका प्रहरी कार्यालय मनहरीले जानकारी दिएकोछ ।
